الترم الأول ^_^..

 

السلام عليكم ورحمة الله وبركاته ^_^..

كيف حالكم جميعا ؟!.. ان شاء الله كلكم في خير و صحة وعافية..

في هذي التدوينة حتكلم بالتفصيل عن الترم الاول ومواده .. ان شاء الله اقدر اوصلكم فكره عامة و واضحه للترم الاول ..

اول حاجه محا يكون عندكم صلاحيه انكم تختارون المواد اللي تبغون تدرسونها للترم الاول .. لان الكلية محدده المواد اللي لازم تاخذونها للترم الاول والثاني .. 

وفيه نصيحه مهمه جدا جدا .. كل يوم تأكدوا متي يسمحون لكم تسوون جداولكم عشان تسجلون موادكم من بدري ولا تتورطون .. ف احسن لكم سجلوا من بدري عشان تختارون الشعب الحلوة والاوقات اللي تناسبكم عشان تقدرون ترجعون البيت بدري P: .. (احب بيتنا ^^ و اكره البعد عنه :] )!!

اللي حتسجل متاخر ف الله يعينها حيبقى لها اسوأ الشعب واوقات متأخره يعني ممكن تقعد في الجامعة لأربعه العصر 😦 ..

المهم في الترم الاول حيكون عندك سته مواد وهي :

1. تفاضل و تكامل (MATH202)

2. اتصال هندسي (IE200)

3. رسم هندسي (MENG102)

4. برمجة – ماتلاب – (EE201)

5. معمل فيزياء (PHY281)

6. عربي (ARAB101)

(( فيه نصيحة ثانيه .. الترم الأول جدا جدا سهل مقارنة ب الترم الثاني ومحا يكون فيه ظغط بتاتا ف شدوا حيلكم وحاولوا تحافظون على معدلاتكم انها ماتنزل.. لأن الترم الثاني حيكون فيه ظغط وشوية صعوبة في المواد فممكن تتاثر معدلاتكم منه .. ف اضمنوا الترم الأول ..))

بتكلم لكم عن كل ماده بالتفصيل من جميع النواحي .. و كمان حقول لكم عن اسماء دكتوراتنا اللي درسونا وعن نظامهم (ممكن يدرسونكم ^_^)…

حتدرسوا ثلاثة ايام في كليتنا الجميلة الهندسة .. و يومين في الشطر..

اول ماده الرياضيات:

هذي الماده جدا كانت جميله وانا عن نفسي حبيتها عشان الدكتورة اللي درستنا وكمان عشان كانت معظم مواضيعها جبر ^_^ ..

اسم الدكتورة :

هالة اشي .. ما شاء الله كانت جدا ذكية وتخليك تحبين الماده وتفهمك كل شي .. ماتخرجي من عندها الا و انتي فاهمه كل شي ومايحتاج ترجعي تفتحيه في البيت..

نظام الماده :

عندك في الاسبوع ثلاثة محاضرات محاضرتين تاخذوا فيها دروس وكل محاضره ساعه ونص .. المحاضره الثالثة سكشن عباره عن ساعه ..

السكشن ماتعطيكم هو الدكتوره تعطيكم استاذه ثانيه .. احنا اعطتنا السكشن الاستاذه الجميلة والرائعة لندا الزبن جدا كانت مراعيه لنا وتساعدنا في كل حاجه..

الشباتر اللي حتدرسوها:

1.  درس واحد من شابتر 3 ..

2. درسين من شابتر 4 ..

3. شابتر 5 كامل ..

4. السبعه الدروس الاولى من شابتر 7 ..

5. شابتر 6 كامل..

6. شابتر 8 كامل..

نظام الدرجات:

ما ادري اذا حيتغير لكم والا حيبقى زينا .. بس عموما حيكون فيه دوريين على كل واحد 25 درجة والنهائي حيكون عليه 35 درجة يبقى 15 درجة حتكون كويزات .. هذي الكويزات حتكون مسؤولة عنها استاذة السكشن والباقي الدكتورة حتكون مسؤولة عنه..

كويزات السكشن تافهه وتجيبين فيها 15 بسهولة ..

اما الاختبارات شدوا حيلكم وان شاء الله تجيبون درجات .. بس لازم تذاكرون اول ب اول الماده جدا دسمه وموضوعاتها كثيره لا تخلينها تتراكم عليك..

( نصيحة : حلي السكشن اول ب اول .. لانه حيكون جدا مليان اسئلة .. كل درس محا تقل اسئلته عن 25 سؤال ابدا .. والاسئلة فيها افكار فحلي من بدري عشان لا تتورطي لو لقيتي اسئلة صعبها يسير اسئليها في محاضرة السكشن وتحلها لكم استاذتكم.. من جد لا تسوون زيي وتندمون انا كنت اراكم ولا احل ولما جيت اذاكر تورطت لانها كثيرة وما مداني الوقت امر عليها كلها..)

((بسوي ان شاء الله قسم خاص للرياضيات بنزلكم فيه حلول اسئلة الكتاب والاشياء اللي ممكن تفيدكم..))

بالتوفيق يارب ♥♥..

ثاني مادة الأتصال الهندسي :

هذي الماده كنت اكرهها كره شديد .. احسها تضيع وقتي ع الفاضي وتنزل درجاتي ظلم ..

لا تتأثروا بكلامي ^_^ ممكن تحبوها ..

اسم الدكتورة:

تيتك حواء .. ماليزية .. 

نظام المادة:

عندك في الاسبوع ثلاث محاضرات كل محاضره ساعتين .. الشي الحلو  انه مافي اختبارات لهذي الماده .. الماده كلها عباره عن بحوث و واجبات وبريزنتيشنات..

نظام الدرجات:

اول حاجه حيكون عندك واجب عليه 5 درجات .. بعدين اسايمنت (بحث) عليه 5 درجات .. بعدين اسايمنت ثاني عليه 15 درجة .. و اسايمنت ثالث عليه 15 درجة..الاسايمنت الثالث حتسوي عليه بريزنتيشن فردي وتلقيه قدام البنات و حيكون عليه 10 درجات .. الاسايمنت الرابع حيكون قروب وعليه 20 درجة وحيكون عليه بريزنتيشن للقروب كله وعليه 10 درجات.. المشاركة في الكلاس عليها 5 درجات .. وعملكم كفريق حيكون عليه 15 درجة ..

هذي الماده في كل شي حتلاقي درجات ف انتبهي تضيعي درجاتك وحاولي ما تراكمي وتشتغلي عليها من بدري..

( نصيحه: اختاري قروب كويس من بدري عشان لاتتورطي .. فيه قروبات كان فيها بنات ياخروا شغلهم ويورطوا بقية القروب وفيه بنات كانوا يشتغلوا أي كلام..)

بالتوفيق يارب ♥♥..

ثالث مادة الرسم الهندسي:

هذي الماده انا وهي في عداء شديد .. هي سهله ومافيها شي بس انا قدرتي في التخيل ضيقه P: .. الماده تحتاج مخ نظيف ويتخيل كيف يرسم ومن أي مكان يبدا وهكذا ..

اول الكلاسات حتكون تفاهه كلها رسم خطوط ودواير بعدين تبدا تصعب .. بس الممتع انكم حترسموا اشكال كثيرة حترسموا فازات و مفكات ..الخ

اسم الدكتورة:

مروة ثروت .. مصرية ..

فيه مهندس لطييييف جدا – فيصل قاسم- (الله يوفقه وين ما كان) اكبر مننا بسنتين اعتقد .. كان يساعدنا وينزل لنا مقاطع لمعظم الرسمات كيف تنرسم .. (بحط لكم قناة الولد ع اليوتيوب في قسم الماده).. 

نظام المادة:

محاضرتين في الاسبوع .. كل محاضره ثلاثة ساعات.. محاضره تدرسوا فيها ومحاضره للكويزات..في نص الترم حذفت الاستاذه محاضرة الكويزات وصار محاضره وحده اول نص ساعه تختبروا الكويز بعدين ترجع تشرح..الصراحه انبسطنا بهذا النظام لان محاضرة الكويزات كانت للساعة اربعه العصر.. وكان فيها ظلم لانه كنا ثلاثة شعب ف اول شعبه تختبر كانت تخرج بدري وبقية الشعب تتاخر لاربعه ..

نظام الدرجات:

دوريين على كل واحد 20 درجة .. نهائي عليه 40 درجة .. والكويزات وشغلك في الكلاس وحضورك عليه 20 درجة..

انتبهي تقعدي تضحكي وتلعبي وما ترسمي لانها بعد كل رسمة تمر عليكم وتقيمكم وتشوف هل خلصتي وهل رسمتك صحيحه (عليها درجات ترا ^_^)

( نصيحه : ارسمي اول ب اول ولا تراكمي الرسم ترا كل اسبوع تاخذوا ملزمة اول صفحه حتكون  تقريبا 6 او 4 رسمات ترسموها كلها في الكلاس و ثاني صفحه حتكون رسمات بسيطة المستوى وثالث صفحة حتكون رسمات متوسطة الصعوبة واخر صفحه حتكون صعبه.. احيانا بعض الملازم يزودوا صفحه اسمها تشالنج فيها رسمات صعبة جدا المبدعين و ذوي الخيال الواسع يرسموها ببساطه..)

بالتوفيق يارب ♥♥..

المادة الرابعة برمجة – ماتلاب – :

هذي المادة اعشقها من كلللللل قلبي ^_^.. جدا ممتعه حتنبسطوا فيها وحتسووا برامج صغيرة..

اسم الدكتورة:

تانيا تسمين.. هندية .. كانت تشرح من كل قلبها وتساعدك في كل حاجه .. شرحها كان حلو و بسيط .. والشي الحلوة اللي سوته انها كانت تخلينا نذاكر من السلايدات اسهل من الكتاب و اوضح ..

نظام المادة:

محاضرتين في الاسبوع.. محاضره نظري (ساعه وحده) و محاضره عملي ( ثلاث ساعات )..انا كنت احب اللاب اكثر من النظري لانه  نطبق كثيير اسئلة تخلي المعلومة تثبت وتفهمي احسن من النظري فلا تخافي لو مافهمتي في النظري شي لان اللاب حيساعدك تفهمي ..

نظام الدرجات:

دوري واحد بس وعليه 20 درجة .. نهائي عليه 40 درجة .. اختبارين عملي (دوري و فاينل ) عليهم 20 درجة .. الكويزات عليها 15 درجة .. حضور اللاب عليه 5 درجات.. (كل غياب بنص درجة)

( نصيحة: خليك مركزة  معاها و اكتبي كل معلومة تقولها .. لان فيه واحد من اختبارات اللاب كان في سؤال كل ما حليناه يكون فيه خطا ويحذرك البرنامج راحت قالت انه فيه معلومة قالتها في المحاضره تحل هذي المشكله .. المشكلة الحقيقيه ان اختكم في الله كتبت المعلومة لكن وانا اذاكر ما انتبهت لها .. المهم خلوا عندكم دفتر للملاحظات..ولاتغيبوا عن اللابات لانها اهم شي..خصوصا لابات درس اللوب .. غياب واحد فيها بعدها اتحداك تفهمين لانها مرتبطه ببعض..)

بالتوفيق يارب ♥♥..

المادة الرابعة معمل الفيزياء :

هذي الماده تجيبين فيها +A  بكل بساطة ..

اسم الاستاذة:

نجاة الطويرقي .. جدا كنت احبها صح هيا في بداية الترم كانت تحشر لنا كثير وتقصف جبهاتنا ^_^..بس جدا رائعة وطيبة وتراعي..

نظام المادة:

محاضرة وحده في الاسبوع عبارة عن ثلاثة ساعات.. وهذي المحاضره الجميله لازم تخليك تقعدي في الجامعة لين الساعة 5 العصر.. يعني عندك يوم واحد في الاسبوع حتداومي للساعه 5.. الماده معظمها عملي جزء النظري اقل من القليل ..المادة تسووا فيها ريبورتس (تقارير) بعد كل تجربة لازم تسوي تقرير استاذتنا كانت بس تصحح الرسمة في نفس المحاضره اما التقرير تطلبك تجيبيه مرتب في المحاضره الجايه..(في القسم حقه بحط لكم تقاريري كنماذج)

نظام الدرجات:

الريبورتس عليه 40 درجة .. الحضور والمشاركة عليها 20 درجة يعني كل محاضره حيكون عليها درجتين درجة حضورك و درجة مشاركتك..الاختبار النظري عليه 10 درجات كلها اختياري.. والاختبار العملي النهائي عليه 30 درجة..

(نصيحه: ركزي في التجارب ويفضل انك تصوريها لانك مستحيل يجي نهاية الترم وتتذكري كل التجارب.. اكتبي كل شي تقوله الاستاذه وكل ملاحظه لانه ممكن يجيك في الاختبار النظري شي هيا قالته..)

بالتوفيق يارب ♥♥..

المادة السادسة عربي:

مادة سهلة وقواعد كلها قد اخذناها .. تجيبي +A فيها ان شاء الله بالراحة..

استاذة المادة:

رحمة المحديني .. طيبه  و شرحها كويس .. تكره التاخير وما تحب تشوف احد ماسك جواله في المحاضره .. ممكن تطرد لو شافتك ماسكه جوالك.. وتحب الكل يشارك معاها .. و عندها هواية تختار اللي يسرحون وتسالهم عن الدرس وتعطيك نظرتين محترمة لو ما جاوبتي..

نظام الماده:

محاضرتين في الاسبوع كل محاضره ساعه ونص .. وقتها كان فيه بركه مو طبيعيه تحسيها سنه ونص ..

نظام الدرجات:

دوريين كل واحد عليه 25 درجة .. و نهائي عليه 40 درجة .. واجب بسيط وسهل عليه 10 درجات..

بالتوفيق يارب ♥♥..

 

وفي الاخير احنا كنا زيكم لما دخلنا ضايعين مو عارفين شي عن الهندسة .. لكن ساعدتنا السنيورتا ^_^ سفانة عباس و المهندس فيصل قاسم (الله يوفقهم الاثنين ♥)..

فحبينا احنا كمان نساعدكم .. ف يارب نكون غطينا كل شي عن اول ترم ..

انتظرونا ان شاء الله حنسوي لكل ماده قسم وبنزل لكم كل شي يساعدكم ويفيدكم من نماذج و واجبات وكل شي ..

كمان سارة حتنزلكم نبذه عن الترم الثاني قريب ان شاء الله..

تاكدوا كل فتره تدخلوا المدونة عشان تشوفوا اش الجديد اللي نزل عشان تستفيدوا ..

اعتبروها مرجع لكم في أي حاجه تحتاجوها ..

احنا جاهزين لاي استفسار تبغوه حنسوي صفحة استفسارات اسالوا فيها و ان شاء الله صحباتنا المهندسات مايقصروا ويساعدونكم..

في النهاية ” ما أتيته إن كان صحيحا فهو من عند الله وإن كان خطأ فهو من الشيطان ” ..

ربي يسهلكم ♥♥..