السلام عليكم ورحمة الله و بركاته ^_^ ..
كيف حال الحسناوات الجميلات .. ان شالله تكونوا بخير وسلامة =)
في هذي التدوينة اللطيفة حتكلم عن مواد الترم الثاني على حسب الخطة الدراسية كاملة الي انتو مجبرين تاخذونها كاملة للاسف =(
بقولكم هالترم معروف انه “ الترم المقبرة ” مو من حيث صعوبة المواد لا ابدا المواد عادية نسبياً لكن المشكلة ان كل مادة تحتاج وقت , يعني لازم لازم توفقون بين المواد اعرف انه صعب وانا للاسف فشلت اني اوفق بين هالمواد و طاح معدلي لكن و ولللككككن !! في ناس خرجوا من هالترم ب 5/5 وان شالله انتوا تكونوا منهم حبايبي ..
مواد الترم هيا :
1- تفاضل وتكامل –رياضيات- (MATH 203)
2- تصميم هندسي (IE201)
3- معمل كيمياء عامة (CHEM281)
4- اقتصاد هندسي (IE255)
5- فيزياء عامة مع المعمل حقها -_- (PHYS202)
6- ثقافه اسلامية -1- (ISES101)
المادة الاولى : تفاضل وتكامل –رياضيات- (MATH 203)
هاذي المادة كانوا يقولو عنها سهلة و حلوة و اسهل من 202 بكثيير لكن صراحة انا شفت العكس !
المادة اغلبها اشياء في 3D وصعب تخليها خصوصاً في الرسمات . و لازم تحلو سكشن اول باول لاااااازم لان فيه افكار كثيرة و تحسي الدرس تافه لكن سكشنه فظييع !
دكتورة المادة
د.لمياء القحطاني , الدكتورة طيبة وحبوبة بس اهم شي لازم تشاركي معاها و تكوني في الصفوف الي قدام عشان تحفظ اسمك و تراعيك على حسب اجتهادك , فيها مشكلة ماكانت تفهم مرة كويس يعني تفهمي الاشياء البسيطة لكن مو كل شي ينفهم معاها .
نظام المادة
25 على الدورين الاول والثاني و 35 على الفاينل و 15 على المشاركة و في كويزات خفيفه من خمسه درجات و هي كانت عبارة عن 3 كلاسات في الاسبوع من ساعه و ثلث –كلاسين محاضرة والثالث سكشن – او على حسب دكتورتكم يمكن بعد شابتر تسوي محاضرتين سكشن و كدا يعني
الشباتر الي حتدرسوها
1- CH 10
2- CH 12
3- CH13
4- CH14
المادة الثانية : تصميم هندسي (IE201)
التصميم و مادراااك ما التصميممم !! ياكل الوقت اكلللللل , هو سبب كل المشاكل في هذا الترم , يعني لو مافي تصميم كان الوقت اتقسم على باقي المواد بكل راحة .. لكن هو ياخذ كل الوقت لانه عبارة عن اسايمنتات تسوونها و اشياء تافهه حتكلم عليها تحت =)
دكتورة المادة :
م.وفاء ابو حسين , اردنية
نظام المادة :
عبارة عن 3 كلاسات من ساعتين في الاسبوع , الشغل في دي المادة حيكون قروبات ماعدا اول اسايمنت حيكون فردي , القروبات مو على كيفكم للاسف راح تصنفكم الدكتورة على حسب معدلاتكم يعني في القروب الواحد يكون فيه الي معدلها 5 و 4.9 و كذا يعني .
هاذي المادة نظامها عجييييييب غريببببببب !! اصلا اول كلاسات تقريبا اول 3 اسابيع بيدوكم ملزمة تقرووها و حتختبروا فيها عن نظام المادة و معاها كالندر يقولك كل يوم في الاسبوع ايش عندك فيه , و تكون الاسابيع مقسمة الى قسمين : كونسبت – CONSEPT- و لاب –LAB-..
ايش يعني اسبوع الكونسبت ؟ يعني الاسبوع الي يكون فيه الكويزات و اسبوع المناقشة في الكلاس و كمان حتديكم IN CLASS اسايمنت تسووه مع بعض .. و اسبوع اللاب حتسوو انتي و قروبك الاسايمنتات المطلوبه منكم ,, طبعا في موقع للمادة حنحطلكم الرابط حقو في قسم المادة هوا تنزلو منوو كل شي متعلق بالمادة , و لكل اسايمنت في اللاب تشك لست تنزليها و تطبقي الي فيها عشان تسوي الاسايمنت
التقييم في دي المادة مو بالدرجات يعني بالحروف مثلا
1- شي اسمو EXCEED و هذا حرفو E و يساوي بالدرجات 100 ماراح تاخدوه الا لو سويتو شي زيادة على التشك لست
2- و التقييم التاني = MEET –M- هذا يعني من 80 -95 و تجيبي ميت لما تسوي كل شي زي التشك لست
3- NEED IMPROVEMENT = NI و هذا حتاخذوه لو نقصتوا من التشك لست حاجة و راح تضطروا تعيدو شغلكم !
4- NCE = NO CERDIBLE EFFORT و هذا يعني شغلك ماراح تتقيمي عليه و لا كانك سلمتي شي ..
5- NO SUBIMTTAL = NS , و هذا يعني انك ماسلمتي العمل اصلا !
الكويزات :
المادة دي فيها 10 كويزات في كل اسبوع كونسبت كويزيين يوم الاحد و يوم الخميس وهيا الكترونية لمدة تقريبا 7-10 دقايق في بدايه كل كلاس ..
كيف حتذاكروا الكويزات !!؟ راح يحددلكم الكالندر جزئية من الكتابين حقون المادة او كتاب واحد يعني و يقولكم اقروؤها و حتختبروا فيها و التقييم برضو زي ماقلت فوق لكن الشي الحلو انو لوجبتي من NI و تحت يمديك تعيدي الاختبار في اسبوع اللاب في نفس اليوم حق الاختبار الاصلي =)
في مخلصات الجزئيات الكويزات تنزل بشكل دوري في مكتبة صراحه ناسية اسمها دحين و البنات كانوا يذكروا منها و يجيي نفسووو !! لانو حيكون معاها صفحات اسئله عشان تتدربوا , في مشكلة كمان لازم اقولكم عليها الي هيا انو في اسئلة يجيبها السستم ماتكون من الجزئية و تختاروا خطا ف حتنقصوا للاسف و دا اكتر شي كان يقهرنيييييي =(
نتكلم الحين عن الكويز نفسه : زي ماقلت فوق انه من 7-10 دقايق والكتروني و فيه 7 اسئله تقريبا ماتعدي السوال الا لما تجاوبي عليه و عندك فرصتين للاجابة اول شي لو طلع خطا عندك فرصة ثانية عشان تجاوبي ولو برضو خطا خلاص يروح السوال , راح يطلعلك جوابك خطا او صح من اول ماتختاري *_* .. اذا جاوبتي كلها صح بدون ماتسخدمي فرصة ثانية حتاخذي اكسيد ^_^
كيف تاخذي A+ في التصميم ؟؟!
عليكي بس انك تجمعي 3 اكسيدات من الكويزات و 3 اكسيدات من اللاب – الي هي اسايمنتات – و تضمني الـ A+ اذا كانت الي تدرسك امينة -_-
ايش حتسووا في LAP WEEK ؟؟!
حتعملوا اسايمنتات اول واحد حيكون فردي و الباقي مع قروبك و حاولوا تبتكروا اشياء معاه عشان تجيبوا اكسيد مثلا سي دي , البوم , وحركات كدا يعني وكمان حتشتغلوا على مشروعكم الي هوا اختراع او أي شي كذا هندسي برضو كلو راجع لدكتورتك .
المادة الثالثة : معمل كيمياء عامة (CHEM281)
جميييييييييييييييل هالمعمل جميلللللللللل جدا و مسلي و التجارب حلوة و تافهه وخفيفة و تستمتعوا مع صحباتكم فيه
دكتورة المادة :
أ.دعاء باعامر , الله يسعدددها مرررررة حبوووووبة و تتكلم معاكم و طيبة و ماتدقق في التصحيح و لا شي و مرة خفيف شرحها و كانت تشرح ف البدايه و تخلينا نسوي مع بعض , حتنبسطوا جدا جددا اذا درستكم .
نظام المادة :
اللاب حيكون مرة وحدة في الاسبوع 3 ساعات , حتدرسوا ملزمة يدوكم هيا فيها تجارب و كان عبارة عن قسمين , اول قسم : الاحماض و القواعد و كيف تكشفوا عنها حتختبروا فيها نظري دوري و عملي دوري و ماتدخل معاكم في النهائي , اما جزئية النهائي عبارة عن اربعه تجارب و برضو حتختبروا فيها عملي و نظري ^_^
المادة الرابعة : اقتصاد هندسي (IE255)
مادة مدري ايش تبغى في الحييييياه !! كلها عن الربح والخسارة و الفلوس و كذا اقتصاد يعني عموما هيا مادة صناعيه للي حابه تخصص صناعي حتنبسط فيها
دكتورة المادة :
م.تانيا تسمين , اول شي المادة مو تخصصها و هي مو فاهمتها لكن لقل الدكاترة عندنا هيا مسكتها و صراحه كانت تبذل جهدها و مجتهدة و تحاول تفهمنا بس مااااا نفهم =( !! عندها مشكلة في توصيل المعلومة للاسف , لكن انا كنت اركز معاها و افهم احيانا بس لازم تركزززززززززي معاها , و بعدين في اخر اسبوعين جابولنا د.منظور –خااااااااااااااااااايس بمعنى الكلمة- اخذنا معه اخر شبترين ولا فهمت حتى حرف واحد معاه =(
نظام المادة :
اول شي هي عبارة عن 4 كلاسات في الاسبوع , 3 منها تكون 50 دقيقه تاخذوا فيها محاضرة والكلاس الرابع عبارة عن تتوريال تحل معاكم فيه تمارين وكان ساعه ونص .. بالنسبه للاختبارات 20 على كل دوري و 35 على النهائي و فيه مشروع للمادة طبعا لازم تستفسروا من البدايه عنه و تخلصوه لان احنا ماكنا نعرف عنه و عملناه في الاختبارات النهائية و عليه 5 و الحضور 5 و الواجبات عليها 10 و في 3 كويزات كل واحد من 10 برضو بس حتنحسب في النهايه من 5
المادة الخامسة : فيزياء عامة مع المعمل حقها -_- (PHYS202)
المادة عبارة عن كهرباء و مجال كهربائي و مغناطيس و المجال المغناطيسي -_- , ماحبيتها ابدا و لا حبيت دراستها صراحه و لا معملها للاسف =( حشرحلكم عنها في نظام المادة اكثر .
دكتورة المادة :
د.ريم الطويرقي , مررا شرحها كويس و رااااائعه اخلاقاً لكن مشكلتها اسئلتها تذبببببببح ! منجد اسئلتها عجيبة لانها كانت تجيبها من التست بانك والحمدلله اكتشفنا و ذاكرنا الفاينل منه و ياريت لحقنا من بدري لكن قدر الله و ماشاء فعل . راح نحطلكم الرابط حق التست بانك في قسم المادة و ان شالله تستفيدووا منه
واستاذة المعمل كانت أ.العنود العامودي تجننن مرة طيبة و عسل و حبوبة و الله يسعدها وين ماكانت يارب =)
نظام المادة :
عبارة عن كلاسين في الاسبوع من ساعه و ثلث و المعمل برضو 3 ساعات , و الدوريات من 15 اما الفاينل كان عليه 40 و المعمل عليه 20 , المعمل كان حلو و استاذات المعامل الله يسعدهم يجننوا و يساعدوا في لازم تضمنوا 20 المعمل كاااملة و بالنسبة للمعمل بس اختبار واحد من 10 الي هو عملي و مافي نظري اما ال10 الباقية هيا للريبورتات الي تعبوها في الكلاس .
المادة السادسة : ثقافه اسلامية -1- (ISES101)
انا ماحبيت الثقافه ابدا لانه كلها حفظ وانا اكرررره الحفظ صراحة و كانوا دقيقين في الاختبار يجيبو بالنص للاسف و كانت درجاتي تروح =(
دكتورة المادة :
أ.صديقة الدقس الجميلة العسل الكل شي حلو في الحيااااه , مرررررررررة نحبها كلنا و راقيه في تعاملها و تحكينا قصص مرة حلوة و وقت محاضرتها مرة ممتع ^_^
نظام المادة :
الاختبارات و تكون الكترونية يعني عليكي تصمي الكتاب و تدخلي و بس ^_^ , الدوريات من 25 و الفاينل من 40 و باقي 10 درجات تكون على المشروع و هاذي دكتورتكم تحددوا ^_^
نصيحه اخيرة :
ان شالله مااكون كثرت كلام هههههههههه ويارب تستفيدوا و يكون ترم سهل عليكم بس انصحكم لا تهملوووووووا و الله حتضيعوا خلوكم اول باول لان هالترم فقط مشكلته الوقت و ربي يسهلكم ياارب و يوفقكم و ان اخطأت فمن الشيطان و بالتوفيق للجميع =)
لو سمحتي رابط التست بانك لمادة الفيزياء202 واذا تعرفي عن فيزياء 203 كمانا ضروري الله يخليك