المستوى السادس-الهندسة الصناعية

اهلًا و سهلًا ;

هنا راح يبدأ الحديث عن مواد الترم الثاني في تخصص الهندسة الصناعية، و اللي مشينا تمامًا على النظام المحدد من بداية الترم – بحمد الله – . راح أحاول أفصّل بشكل أكثر عن الترم الأول ، و أتمنى الجميع يستفيد .

الادارة الهندسية IE-256 :

هذي المادة بساعتين بالمعدل ، الحلو فيها تنظيمها الواضح جدًا.

الحضور فيها بـ 5 درجات (وهذا التقسيم مع دكتور باسل فممكن يتغير معاكم) ، وفي IG assessment  هذا الاختبار يكون جزئين ، جزء منها بشكل فردي وهو اختبار من 5 درجات و جزء بشكل مجموعة ويكون من 3 درجات (اختبار المجموعة يعتمد على فيديو تشوفوه وتحلوا اسئلة عليه) وبعدها يقيم أفراد المجموعة نفسها بعضهم البعض من .75 ، يصير المجموع 8.75  . مجموع هذي الاختبارات من 100 راح يكون 35 يعني بمعدّل 4اختبارات.

فيه برضو اختبار اسمو exam  و هذي برضو بشكل فردي وحتكون 3 طوال الترم من 15 درجة يعني مجموعها 45 .

في برنامج راح تشتغلوا عليه بـ 5 درجات اسمه Microsoft Project Assignment

آخر حاجة راح يكون فيه case study  تشتغلي عليها مع مجموعتك ( توزيع الدرجات راح يكون 5 درجات على البرزنتيشن و 5 درجات على طريقة العرض نفسها)

المادة صراحة سهلة بس درسناها مع دكتور باسل ويعتمد غالبًا على الأمثلة اللي يقولها بالكلاس ، فيعني اذا مركزة معه راح تاخذي الA+ إن شاء الله.

أعتقد اغلبيتنا ماكان عارف نظام الدكتور في الأمثلة فحاس شوية ، الاختبارات تعتمد على مذاكرتك للكتاب برضو ، و أي حاجة يركز عليها بالكلاس راح تجي حتى لو تاريخ حدث ما .

فيه جزئية برا الكتاب راح يعطيكم عليها سلايد وهذي يكفي مذاكرة السلايد فيها.

في اول exam ماكان في مشاكل ، الثاني كان فيه رسمة الاغلب حاس فيها فحاولوا تتدربوا كثير وبرضو اخر exam  كان فيها مسألة عن الأسهم والحوسة اللي بآخر جزئية ، هذي لازم تركزوا معاه وتفهموا ضروري .

رابط المادة فيه الكتاب وتست بانك للشابترز اللي مطلوبة منكم و البرزنتيشن اللي اشتغلنا عليه أنا ومجموعتي.

رابط للمادة

بحوث عمليات -1-  IE-311 :

هذي المادة تعتبر سهلة وب3 ساعات في المعدل لكن مشكلتنا كانت في مصدر المذاكرة ، الكتاب ماكان موجود النسخة المطلوبة ، و ملخبط جدًا صراحه ، كنا نفتح نشوف اسئلة اخر الشابترز اللي بتحلها معانا الدكتورة + المحاضرات نكتبها معاها+ سلايد وملفات بي دي اف كانت تعطينا اياها.

توزيع الدرجات  كان كويزز 10 و اسايمنتس 10 و ميد تيرم 10 و 2 ميجور كل واحد من 10 و بروجكت 15 واخر حاجة فاينل من 35.

لكن احنا كان فيه جزء عملي برضو فتغيّر شي بتوزيع الدرجات وما اعرف كيف حسبوهاا بالضبط.

بس عمومًا المادة تحتاج تدريب عشان ما تنسي ، في البداية فيه رسم ضروري تركزي فيه ، بعد كذا باقي المنهج مسائل متوسطة نوعًا ما . وفي الاخير كمان فيه جزئية رسم تعتبر بسيطة .

درجات الكويزز و الاسايمنتس في يدك أكثر من غيرها فحاولي تضمنيها .

اخذنا المادة مع دكتورة نيارة و المعمل مع أستاذة دعاء بوقري .

رابط المادة ماقدرت ارفع لكم فيه غير الكتاب باحتمال انو السلايد ممكن تتغير

رابط المادة

تطبيقات الحاسوب في هـ.ص-1- IE-322:

مادة السي شارب ، 3 ساعات بالمعدل ، ومادة تاخذ من وقتك و جهدك كثير.

للأمانة هذي المادة لازم تشدّوا حيلكم فيها قد ماتقدروا ، تدرّبوا في البيت كثير وحاولوا تركزوا تمامًا بالمحاضرة ، من أهم مواد الترم الي تحتاج وقتك فيها. اكتبوا اللي بتقدروا معاها وهيا بتشرح عشان في البيت لما توقفوا عند أي نقطة تكونوا موضحّين لنفسكم كل شي.

أخذناها مع مس تانيا ، وتقسيمها كان 2 ميجور كل واحد من 15 كويزز مجموعهم 10 درجات ، و واجب مجموعهم 10 درجات ، و 2 Research Work  كل واحد من 5 درجات . 

حيبقى بروجكت من 15 و فاينل من 25.

طبعًا الاختبارات مو زي التدريبات أكيد ، لكن تدريبك راح يخليك تعرفي كيف توصلي للمطلوب ، ضروري تقرئي الاسئلة اللي تاخذوها وتفهميها مزبوط عشان تقدري تعرفي المطلوب وتوصليلو. احيانًا تاخذي وقت في الاختبار على بال ماتفهمي بس لو تدربتي كويس حتصير سهالة إن شاء الله

كل الاختبارات حتكون جزئين عملي و نظري ، النظري راح يكون غالبًا من اسئلة نهاية الكتاب أو لابشيت تديكم هيا ، و العملي يعتمد على فهمك فقط .

البروجكت هوا اللي ياخذ وقت فحاولوا تشتغلوا فيه من بدري وترتبوه لانو في الاخير برمجة راح تجيك فكرة تعديل لآخر لحظة .

طبعًا الاسايمنتس اضمنوا الفل مارك فيها والبروجكت برضو ، لانو شغل ببيتك وعندك فرصة ووقت .

في الرابط حطيت لكم الكتاب + حلول أسئلته عشان وقت المذاكرة .

رابط المادة

 الاحصاء الهندسي IE-332 :

مادة 3 ساعات ، منظمة تمامًا و أوضح بكثير من احصاء الترم الأول ، طبعًا كلهم نفس الكتاب .

المادة فيها 6 اسايمنتس يُؤخذ منها أفضل 4 ومجموعهم من 100 راح يكون 10 درجات ، وفيه 5 كويزز راح يؤخذ منها 3 ومجموعهم 10 درجات، البروجكت راح يكون عليه 10 درجات وحيبقى ميد تيرم واحد عليه 35 درجة وبعدها فاينل 35 درجة برضو.

أخذناها مع دكتور رائد ، يشرح شرح وافي تمامًا و كل ماكنتي معاه بالشرح كل ما حليتي افضل لانه يذكر معلومات مهمة جدًا وتكون مو موجودة بالكتاب او بين السطور ، طبعًا هذي راح تكون أول مادة لكم OPEN BOOK >  يعني الكتاب راح يكون مفتوح معاكم في أي اختبار او كويز.

طبعًا جزئية تحتاج تركيز للأمانة لو مانتي فاهمه ومركززة ماراح يفيدك وجود الكتاب ، الكتاب يفيدك بإنك ماتحفظي قوانين وغيره لانو اصلا حتكون طويلة جدًا وصعبة + لازم تتعلمي كيف تطلعي نص المطلوب من خلال الآلة بشكل سريع وراح تلاقوا باليوتيوب مية طريقة و طريقة توفر عليك الوقت .

راح يكون فيه جزء تتوريال عملي وفيه اسبوع راح يكون اسايمنت واسبوع كويز حسب نظامنا . اسبوع راح تتدربوا عملي قبل الاسايمنت واسبوع راح يكون حل اسئلة محددة نهاية كل تشابتر .

لو حنصحكم نصيحة في هذي المادة “ركّزوا تمامًا مع الدكتور”

هنا رابط فيه الكتاب + حلول الاسئلة .

رابط للمادة

معادلات تفاضلية -1-  MATH-204 :

امم واضح المحتوى من اسمو ، المادة بـ 3 ساعات بالمعدل ، وقد ما اقدر اقول مهم جدًا تحلوا السكشن أول بأول وبنفسكم بدون ماتفكروا تنقلوا من مكان . 

نظام الدرجات :20 دوري 1 ، 20 دوري 2 ، نهائي 40 درجة ، 5 واجب الكتروني و 5 على مشروع ، و10 على كويزز

الماث دائمًا و أبدًا اهم حاجة فيه حل الاسئلة أول بأول ، لانها تكون مليانه افكار وتفتح مخك.

رابط المادة فيه نماذج اختبارات + حلول اسئلة الكتاب 

رابط للمادة

 الثقافة الاسلامية -3- ISLS-301 :

الثقافة نفس النظام ، درجات للمشروع ودرجات الاختبارات ، احنا اخذنا مع دكتورة حطت درجات على مشاركة ، تعطينا سؤال بداية المحاضرة ونحل.

عمومًا بتنبسطوا في هذا المستوى من الثقافة 

الرابط حيكون فيه ملّخص للكتاب في حال اضطريتوا له 

رابط للمادة

 أساسيات ورش  Meng-130 :

نظام المادة كان من كويزز مجموعها يوصل 10 ، و 2 ميد تيرم كل واحد من 15 ، الريبورت 10 و البرزنتيشن 20 ، و اخيرًا الفاينل 30 .

المادة لها كتاب لكن جدًا ضحم فالدكتورة كانت تدينا سلايد فيه خلاصة اللي بتشرح ، لكن كمان لازم تركزوا معاها ممكن تقول معلومة مختصرة جدًا بالسلايد فتكتبوا معاها ، و هي بتحاول جاهدة انكم تفهموا المادة أكثر مما تحفظوها.

السلايدات مارفعتها لكم عشان ممكن تعدل او تغير فيها فأفضل تاخذوها من البلاك بورد زي ماحتنزلها لكم.

الريبورت و البرزنتيشن من بداية الترم تخلي كل واحدة تاخذ موضوعها بالقرعة  وحتديكم ربرك تمشوا عليها، ممكن يكون شي انشرح و ممكن يكون لا ، من بداية الترم! و تسليمو يكون اقل شي بعدها بشهرين ، فالأفضل انكم تبدؤوا تبحثوا و تقرؤوا عن مواضيعكم قبل الموعد بكثير عشان بعدها بشهرين حتكونوا في وسط الضغط وهي دقيقة جدًا بمواعيدها فمن البداية لا تضيعوا وقتكم و سووا شغلكم أول بأول.

الكويزز جدًا سهلة و بسيطة ، غالبًا مابتصعب الموضوع وتحط لكم وقت معين من 5-7 دقائق فقط .

الميد تيرم حتكون أسئلة أكثر طبعًا لكن الإجابات مختصرة جدًا جدًا.

لو ركزت على رسمة بالمحاضرة فممكن تجيبها لكم في الاختبار مثلًا تعبي بيانات او صح و خطأ العلاقة بين المتغيرات و زي كذا . هيّا راح توضح كل شيء بالمحاضرة .

عمومًا كلو و اغلب الدرجات كانت عالية لين الفاينل لانو كان وقتها موحد مع الاولاد ، بس برضو لا تشيلوا هم ماتعرفوا ايش ممكن يصير ، المهم شدوا حيلكم في اللي قبل.

 

ختامًا ، هذا الترم لكل مادة مشروع عدا الورش لها ريبورت و برزنتيشن ، وفي كل مادة أقل شي 4-5 كويزز و نفس الشي بالنسبة للاسايمنتس ، يحتاج تنظيم وقتكم من البداية + ابدؤوا مشاريع من بدري قد ماتقدروا ، لو حتى تجهزوا فكرة .

أتمنى أكون أفدتكم لو بالقليل ، اذكروني بدعوة و بالتوفيق للجميع .