اليوم حابة احكيكم عن تجربتي في التدريب الصيفي (وقته بعد الانتهاء من المستوى الثامن).
قبل كل شي صراحة كليتنا ما قصرت ابدا كانت تحاول توفر افضل فرص تدريبية لنا, استاذة امل كانت جدا جدا متعاونة و رائعة, اسلوبها راقي جدا و كانت صبورة علينا رغم الضغط عليها مننا.
اول شي اللي نفسه يتدرب في مكان معين ويقدر يتواصل معاهم فمن الاحسن يتواصل بدري معاهم وياخذ الموافقة بعدين يرجع لكليتنا عشان ترتب معاهم و تشوف كيف نظامهم. في فترة تدريبنا سالت كليتنا هل اقدر اتدرب في مكان معين عاجبني و متوافق مع شروط كليتنا قالوا لي ممكن بس انا اتواصل مع المكان واجيب ورقة بالموافقة بعدين ارجع لكليتنا ويرتبون معاهم, و لكن لضيق الوقت اكلتها على راسي و ماقدرت اخلص اوراقي بدري فما تدربت في هذا المكان و ضيعت على نفسي فرصة التدريب في كاوست. جلست فترة مقهورة اني ماقدمت على كاوست لاني كنت حاطه نظري على هدف واحد, لذا كنصيحة مني لكم قدموا على كل الاماكن ماتعرفي فين الخير مكتوب لك (طبعا الله كتب لي كل خير و تدربت في مكان جدا كويس و لله الحمد).
تجربتي من البداية:
زي ما قلت لكم كان نفسي في مكان معين اتدرب فيه لكن تاخرت بعض الاوراق فما قدرت اتدرب فيه و في نفس الوقت ضيعت فرصتي في كاوست و ماقدمت اوراقي لهم و قفلوا التقديم بدري ( اللي حابه تدرب في كاوست تقدم اوراقها من بدري, لدفعتي كان متاح التقديم للجميع بس بمعدل معين والمقبول فقط 4 طالبات – رغم انهم قبلوا بس طالبتين في الاخير-). في الاخير اضطريت اقدم على شركة الطاقة (ضمن شركة الزاهد) و انا ما كنت مره متحمسه لها لكن قلت اروح المقابلة و ممكن تعجبني و ارتاح لطبيعة التدريب. جا وقت المقابلة و رحت للشركة مع 9 طالبات اخريات -الشركة قالت انها حتقبل فقط 6 من ال 10 المتقدمات- نظام المقابلة كان عبارة عن مناقشة بين المقابل وبيننا احنا ال10, كان يتكلم عن انواع الجهد واش اللي مسموح للاستخدام البشري و كيف يتم نقلها وزي كذا (معظم اسئلته كانت تعتمد على مادة التقنية). المقابل كان يتعمد يسأل اسئلة يفترض تكون اجوبتها موجوده عند كل مهندس كهربائي و كمان كان يسأل اشياء تعتمد على المنطق عشان يشوف تفكير كل متقدمة, في نهاية المقابلة طلب مننا نطلع ورق ونكتب كل معلوماتنا و هو حط لكل طالبة رقم معين. بعد المقابلة اخذنا عشان نشوف نظام الشركة والمكاتب وكمان المولدات اللي ينتجوها و نوع كل واحد منها ولمين يعطوها, بعدها قال لنا انه فيه ايام في التدريب حتكون ميدانية يعني حتروحي لمصانع تابعه لهم. بعد المقابلة ما كنت جدا مرتاحة ولكن استخرت الله و مضيت في امري (قالوا لنا بعد فترة تقريبا اسبوعين حيطلعوا اسماء المقبولات من العشره طالبات). بعد هذي المقابلة بأسبوع تقريبا قالت لنا كليتنا انه شركة العليان وفرت فرص تدريبية واللي حاب يقدم يروح عند استاذة امل ويحط معلوماته (طبعا لازم تسووا لكم CV لك التقديمات), قلت بقدم بس حسأل البنات اللي اكبر مننا عن تجربتهم فيها, طلع وحده بس منهم قدمت واتدربت فيها و لكن مانصحتني فيها ابدا ترددت جدا و قررت اني ما اقدم. بعدها بفترة طلعوا شركة الطاقة اسماء المقبولين و كنت منهم سبحان الله ما اعرف ليه ما كنت مره حابه اني اتدرب في هذا المكان, قعدت فتره متضايقة و احاول ادور مكان ثاني اتدرب فيه. و يوم من الايام سخر الله لي خيره طيبه و جاتني وحده من قريباتي تشتغل في الجامعة و قالت لي انه تقنية المعلومات وفرت فرصة لتدريب طالبات الهندسة و نصحتني اقدم فيها, طبعا رحت لكليتي و سالت عن هذا الموضوع و قالوا لي انه فعلا وصلهم الطلب وانهم قاعدين يرشحوا طالبات معينات يشرفوا واجهة الهندسة. قلت لهم اني حابة اتدرب في تقنية المعلومات و اني ان شاء الله حكون صورة حسنة لكليتي, فقالوا لي قدمي السي في حقك و نشوف هل ينفع او لا طبعا قدمت السي في حقي و ثاني يوم قالوا لي انه تقدري تدربي في تقنية المعلومات و لكن اول شي فيه مقابلة مع استاذتين يشتغلوا هناك و هم اللي حيكونوا مسؤولين عننا. رحنا المقابلة و كان عددنا سبعة طالبات, استقبلونا احسن استقبال كانوا جدا متعاونات معنا ( استاذة. ماجدة الوزان / استاذة. فاطمة باحارث) و قالوا لنا انهم محتاجين لقروبين لانهم يبغوا نسوي لهم مشروعين, المشروع الاول عباره عن برمجة مكتبة اكواد الكترونية (صفحة ويب) تخدم منسوبين الجهة, و المشروع الثاني عباره عن ابليكيشن يقرأ اي باركود الهدف منه انهم يستخدموه في تسجيل الكمبيوترات في الجامعة وتحديد اعدادها و اماكن تواجدها. بعدها خيرونا لاي قروب حابين ننضم بشرط انه ثلاثه مننا يروحوا للمشروع الاول و اربعه للمشروع الثاني. عن نفسي تحمست لفكرة برمجة الابليكيشين و انضميت للقروب الثاني. رجعت البيت و تناقشت مع عائلتي على اش افضل مكان اتدرب فيه هل اكمل مع شركة الطاقة او انضم لتقنية المعلومات كل اللي حولي قالوا لي انتي فكري اش افضل مكان ارتحتي فيه و تحسي نفسك حتتعلمي وتنتجي, جلست تقريبا كم يوم افكر في هذا الموضوع و اسال ناس حولي عن رايهم الى ان استقر رايي على التدرب في وحدة تقنية المعلومات بجامعة الملك عبدالعزيز و استخرت الله وكتب لي كل خير (و لله الحمد). بعدها رحت لاستاذة امل و قلت لها اني حنضم لتقنية المعلومات وحنسحب من شركة الطاقة و زبطت لي الموضوع الله يسعدها.
بعد تحديد مكان التدريب:
اجتمعنا مع دكتورة رضا (كل مجموعة حتكون مسؤولة عنها دكتورة معينة) و وضحت لنا كل شروط و فترة التدريب و ايضا وضحت لنا اش اللي لازم نسلمه لها اثناء و بعد التدريب.
اول شي لازم نخلص 400 ساعة عشان ينقبل التدريب فكنا في الايام العادية نداوم من 8 الصباح الى 2:30 الظهر و ايام رمضان من 10 الصباح الى 3 الظهر. كان فيه اجازة مدتها تقريبا 10 ايام من 25 رمضان الى 5 شوال, بدانا التدريب من 25 شعبان الى نهاية شهر ذو القعدة.
كل اسبوع لازم نرسل لدكتورة رضا و وحدة التدريب بكلية الهندسة تقرير اسبوعي توضحي فيه ماتم عمله اثناء الخمسه ايام ويكون يوم الخميس و قبل الساعه 12. و ايضا يوجد تقرير دوري كل ثلاثة اسابيع تسوي واحد وترسليه لهم.
اذا خلصتي التدريب حيكون عندك مناقشة عن تدريبك وانجازاتك خلاله مع ثلاثة من دكاترة الكلية وحده منهم حتكون دكتورتك المسؤولة عنك اثناء التدريب. طبعا وقت المناقشة حيكون ثاني اسبوع من الترم الاول في المستوى التاسع, منه يحددوا هل تدريبك مقبول او لا ؟ هل انجزتي عمل يستحق التقييم ام لا؟ايضا لازم تسلمي لهم فاينل ريبورت يحتوي على مجموعة من المتطلبات يعطوك هي مع صور لكل ريبورتاتك الاسبوعية و الدورية وسي دي لعرضك. هذي عليها تقسيم درجات معين, بعدها يجمعوا لك الدرجات ويشوفوا اذا جبتي اعلى من 60 درجة فتدريبك مقبول اقل فتدريبك مرفوض.
ملاحظة:
على الريبورتات بنوعيها 20 درجة على الفاينل ريبورت 50 درجة على البرزنتيشن و المناقشة 30 درجة.
((تقنية المعلومات حبت تفتخر بالانجازات اللي سويناها لهم و قررت تسوي يوم نعرض فيه اعمالنا على وكيلة تقنية المعلومات و وكيلتنا دكتورة عبير و دكتورة اماني سلوم و مجموعة من وكيلات و دكتورات اخريات.))
فترة تدريبي:
و لله الحمد ابدا ما ندمت على اختياري لتقنية المعلومات كانت ايام حلوة استفدت و تعلمت و اشتغلت و انجزت. الاستاذات و الموظفات كانوا جدا متعاونات معانا ابدا ما حسسونا بالضياع, كانت المسؤولة عننا استاذة ماجدة الوزان الله يعطيها العافيه على كل مساعده لنا. في البداية ما حبت تدخلنا على العميق و نضيع و لا نستفيد ففكرت في فكرة انها تسوي جدول وتقسم لنا الاشغال عليه في البدايه تعلمنا على استخدام برنامج الفيجوال ستديو و سوينا ابليكيشن بسيط جدا عشان نتعلم على كل التولز الموجودة في البرنامج, بعدها علمتنا على المفهوم الجديد اللي هو Internet of Things و ايضا ال Clouds و جربنا المفهومين باستخدام ال Mbed IoT Device و Raspberry Pi. بعدها بدأنا نشتغل على مشروعنا الأساسي.
الريبورتات الاسبوعية ما عليك الا انك تكتبي باختصار انجازات يومك التدريبي. لذا في الروابط اللي في الاسفل حتلاقوا ريبورتاتي عشان تستفيدوا منها.
طبعت الريبورت و غلفته, جبت فايل ( العادي اللي بريالين) و حطيت فيه الفاينل ريبورت و سي دي فيه العرض و الريبورتات الاسبوعيه طبعتها و حطيتها في جيب لحالها والدورية برضه طبعتها و حطيتها في جيب ثاني بعدين حطيتهم في الفايل. برا الفايل طبعت ورقة بمعلوماتي و لصقتها وسلمتها.
اخيرا ماتدري وين الله كاتب لك الخير لذا قدمي في كل مكان و استخيري و ان شاء الله يرزقك الله باللي يريحك.
World of Engineers 