تقنية الهندسة الكهربائية ( EE 306 – Electrical Engineering Technologies)
السلام عليكم و رحمة الله و بركاته ..
في هذي التدوينة حتكلم عن اهم مادة في قسم الكهرباء و هي تقنية الهندسة الكهربائية.
نصيحة للكل هذي المادة اهم شي في تاريخك الهندسي افهميها باي طريقة و لاتضيعيها على نفسك, صراحة احنا مافهمنا المادة مزبوط و ندمنا اشد الندم لو رجع فيني الزمن كان ضغطت على نفسي باي طريقة وفهمتها..استوعبنا اهميتها في اول مقابلة لنا في التدريب الصيفي, رحنا شركة و كان اهتمامها اكثر شي بالهندسة الكهربائية معظم اسئلة المقابلة كانت تعتمد على هذي المادة ومنها عرفنا قد ايش مهمه.
المادة مستواها متوسط الصعوبة, صراحة كنا ضايعين في المادة واللي زاد ضياعنا اننا كنا نعتمد على كتابين والكتابين مستواهم صعب ومايساعدون على الفهم و كمان المصادر في الانترنت جدا قليلة.
المادة عبارة عن شرح لمفاهيم القياسات الكهربائية و الاخطاء و عدم الدقة في القياسات الماخوذة. ايضا تشرح بالتفصيل المكونات الكهربائية الاساسية لاي دائرة مثل: الريزيستور, الكابستور, الدايود و الترانزستور. بالاضافة الى انها تشرح بالتفصيل تركيب و خصائص و طرق استخدام اجهزة قياس الجهد و التيار الكهربائي و الطاقة الكهربائية و درجة الحرارة.
توزيع درجات المادة:
بالنسبة للاختبارات, مستواها كان اقرب للصعوبة (ما اعرف هل كان فعلا صعب! او انه بسبب عدم فهمنا للمادة جيدا) والاسئلة كانت اطول من الوقت المحدد!
بالنسبة للابات, كانت جدا مهمة لانها تفهمك معظم استخدامات الاجهزة بالاضافة لبعض مفاهيم المادة العلمية. الاختبار النهائي للاب كان عبارة عن مجموعات, مهم جدا تنظيم الوقت بينكم لانه لازم تركبوا الدائرة و تحسبوا القياسات وتكتبوا ريبورت يحتوي على مقدمة و شرح لنتائج التجربة و خاتمة. انتبهوا للوقت ولتنظيم الفريق بطريقة صحيحة.
بالنسبة للبروجكت, انت وفريقك تختاروا البروجكت اللي يعجبكم لكن لازم يكون دائرة تحتوي على بعض من المكونات الكهربائية اللي درستيها في المادة (تسوي عليها بروبوزل عشان تشوف الدكتورة فكرتكم قبل ماتنفذوها) و تسوي عليها ريبورت كامل. و في الاخير عشان تاخذي درجة كاملة لازم تسلمي ثلاثة اشياء فاينل ريبورت و دائرة تشتغل صح (اول شي تشتغلوا على البريدبورد المن تزبط بعدها لازم تلحموا الدائرة و قدام الدكتورة) و بورتفوليو.
قبل كل شي احب اذكركم انه هذي التدوينات كمساعده او مرجع فقط .. يعني استفيدوا منها في معرفة نظام المادة طرق الحل والتنظيم و المذاكره مع عدم النسخ وهذا كله لمصلحتكم (اصنع نفسك تصنع نجاحك).
# روابط ريبورتات لاباتنا ( لاب 1 و 6 كاملين عندي, بقية اللابات بس موجود عندي اجزاء شغلي والكاملة عند بنات قروبي, بسبب انشغالهم ماقدرت اطلبهم هي – للأسف-):
طبعا الدوائر الكهربائية لازم ترسموها..معظم القروبات استخدمت برنامج OrCAD في رسمها.. انا و قروبي ما حبينا نكون نفس الشي معاهم فرسمنا دوائرنا بنفسنا و نتيجة لذلك اثنت علينا الدكتورة..