PHY281

السلام عليكم ورحمة الله و بركاته 🙄 ..

هذي التدوينة فيها شرح بالتفصيل عن معمل الفيزياء ب الاضافة لنماذج للتقارير ..

استاذة المعمل حقتنا كانت تخلينا نسوي تقارير اجباري .. فيه بعض الاستاذات درسوا صحباتنا ما كانو يطلبوا تقارير ..

بس احسن لك اكتبي تقرير لانه لما تجي تذاكري حتحتاجيها ..

المعمل لازم تحضريه لان حضورك عليه درجة .. اختاري بنات كويسات لانك حتشتغلي معاهم في كل معمل .. مشاركتك وتفاعلك وشغلك عليه درجة ..

كل معلومة تحسيها مهمة سجليها في دفتر .. التجارب صوريها عشان تتذكريها اذا جيتي تذاكري ..

لازم تجيبي معاك ورق رسم بياني ومسطرة طويلة و آلة وتطبعي كل التجارب وتحطيها في ملف وتجيبيها كل معمل ..

ملزمة التجارب تقريبا اربعة او ستة اوراق فيها اسئلة عن التجربة واستنتاجات للقوانين سهلة و واضحة ..

الاختبار النظري: عليه عشرة درجات بتكون عشرين فقرة اختياري .. طريقة المذاكرة ذاكري اوراق التجارب و الاشياء النظرية في التقارير ..

صراحة الاختبار كان يعتمد شوية على فيزياء السنة التحضيرية ويعتمد على فهمك لكن ذاكري وبتحلين ان شاء الله ( سهل )..

الاختبار العملي: ركزي في المحاضرات على تركيب الاجهزة وطريقة التجربة .. في الاختبار السؤال الأول حتسوي تجربة كاملة عمليا وحتكتبي اسماء الادوات وجدول الحسابات حقك .. السؤال الثاني تسوي نص تجربة .. السؤال الثالث يا تطلعي معلومات من رسمة او تسوي حسابات .. مجملا اختبار سهل بس ركزي ولاترتبكي..

التقرير حقك مو لازم تكتبي الطريقة بس تكتبي الهدف من التجربة والادوات و جدول الحسابات والقوانين الاساسية المستخدمة كل قانون تكتبي تعريف المتغير حقه ..

مثلا لو كان عندك المسافة تروحي تكتبي هي المسافة التي قطعتها الكرة اثناء سقوطها الحر زي كذا ..

الحلو في التقارير انه الاستاذات مايطلبوا تكتبيه تقرير رسمي عادي ممكن صور, الوان اللي تبغيه..

هذا شكل عام لطريقة كتابة التقارير :

sample+report

هذي كم تقرير من عندي .. انا كنت احب ارتب تقاريري عشان احب اذاكر من شي مرتب :

sample1

sample2

sample3

الرسمة كنت ارسمها في الورق البياني وادبسها مع تقريري .. التقرير الواحد عليه خمسة درجات..

ب اختصار المادة تجيبي فيها +A بكل سهولة ان شاء الله ..

بالتوفيق ❤ ..

(  وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ ) ..